حديث كلما تذكرته انشرح صدري حتى لو أنا في أتعس حالاتي :
' من لزم الإستغفار جعل الله له من كل هم فرجاً ومن كل ضيقٍ مخرجاً ورزقه من حيث لا يحتسب '
مره قالت لي أستاذه- الله يوفقها وين ماراحت- إذا نسيتي شي من اللي ذاكرتيه اقلبي الورقه واستغفري وبتذكرينه بإذن الله !
ماصدقت لين جربتها بنفسي ..
وعلى فكره تراي جربتها مو في شي نسيته
لا
جربتها في شي ما أعرفه أصلاً ولا مر علي ..
وطرت علي إجابه إقتنعت إني أحطها بالمكان الفاضي
و
'شي أحسن من لا شي'
العجيب إني طلعت من القاعه وسألت البنات عن السؤال وطلعت الإجابه اللي حطيتها هي بالضبط الجواب المطلوب !
تتوقعون بس هذي نتايج الإستغفار ..
لا
شخص أعرفه على صراع دائم مع ' معدته ' يقول إذا تعبت خلاص مالي إلا المستشفى وإبرتين مسكن ..
يقول مره كان عندي اجتماع مهم خلصت أشغالي ويوم جيت أنام بدت معدتي تلمح ..
وشوي شوي الألم يزيد ..
يقول جلست أستغفر بفراشي لين .......
غفيت و ما حسيت إلا والمنبه يدق على وقت الاجتماع صحيت وأنا مابي إلا العافيه
يعني يقدر الواحد يستغفر بنيه الشفاء أو بنيه طلب الرزق أو بنيه الذريه الصالحه أو بنيه المغفره ..
ومع كل اللي قلته استغفارنا بحد ذاته حسنات تثقل ميزاننا إذا وضع الميزان ..
بيجي يوم نتمنى إن رصيدنا يزيد حسنه .. حسنه وحده بس يرجح بها الميزان يومها بنتذكر إننا فوتنا على أنفسنا حديث عظيم وفرصه أعظم لثروة من الحسنات ..
عن عبادة بن الصامت رضي الله عنه قال :
سمعت رسول الله صلى الله عليه وسلم يقول : ' من استغفر للمؤمنين والمؤمنات ، كتب الله له بكل مؤمن ومؤمنة حسنة ' رواه الطبراني وحسنه الألباني في صحيح الجامع
متخيلين !
بدعاء بسيط كم كسبنا من حسنه !
كم مليون تتوقعون !
يارب رحمتك
لا تخلون لإبليس فرصه ..
خلونا نشد الهمه ..
استعيذوا بالله من الشيطان الرجيم
ومدو لي يديكم ..
نبي ننشر هالحمله على قد مانقدر ..
نبي يشترك فيها الكاتب والمصمم والمصور ..
كلنا هدفنا واحد ..
نبي ربي يغفر لنا ويرضى عنا ..
ياربي لو ما نحصل منها إلا رضاك يكفينا
مستعدين ؟
أنا كتبت هالكلام وأنا واثقه إن فيه غيري بيكتبه بطريقه أفضل !
وأشمل !
وأقوى !
مع إني تعمدت أخليه بلهجتنا المتعارف عليها لأن ودي يوصل كلامي لشريحه يحبون يقرونها كذا فلا تتوانون ..
اكتبوه بطريقتكم وانشروه في كل مكان تقدرون توصلون له ..
