سلام عليكم يا بنوتات يا حلوين
ا فراخ مسلوقة ورز ابيض ونوع خضار وسلطة وتبقى كده وجبه جميلة ومضبوطة وسهله ان شاء الله
اول حاجة دخلنا المطبخ هنغسل اللحمة كويس ولو فراخ نغسلها كويس وننقعها شوية فى ملح ودقيق ولمون او خل علشان تبقى ريحتها حلوة وبعدين نشطفها بميه عادى
نحط حلة فيها مية على النار وتكون مية مش كتير يعني تغطى اللحمة او الفراخ علشان يبقى لها طعم
نسيب المية تغلى وبعدين نحط الفراخ او اللحمه وبصله صغنونة وفصين حبهان وطماطماية صغنونة اوى ونحاول نخلى النار تبقى هاديه وعلى فكرة اما النار بتكون هاديه على الاكل بيطلع ريحته وطعمه احلى
اول ما نحس ان اللحمه دخلت فى السوي شوية نحط الملح وندوق لحد ما نحسه مضبوط معانا ومنحطش الملح من قبل اللحمه ما تستوى علشان هتاخد كده وقت اكتر فى السوى
خلاص الفراخ بتاعتنا او اللحمه استوت وكله تمام نطلعها فى مصفاه على جنب وممكن نقدمها كده او نحمرها حسب ما نحب
والفراخ ممكن بدل ما نحمرها نقلب معلقتين زيت على معلقتين صلصة او كاتشب وشوية ملح وشوية فلفل اسود وندهن بيهم الفراخ وندخلهم تحت الشوايه هتطلع متحمرة وجميله زى المشوية بالضبط
كده خلصنا ما اول طبق
نيجي للخضار ممكن نعمل تورللي وبسيط وسهل جدا برضه
نقطع فى صينية بطاطس وكوسة وبصلة وفلفلة خضراء حلقات بس حلقات البطاطس تكون اتخن من الباقيين لان البطاطس بتستوى بسرعه ونحط عليها طماطم مفرومة من غير تسبيك ولا اى حاجة علشان تبقى خفيفه او معلقتين صلصلة جاهزة وندق كم فص توم كمان عليهم بيخلوا ريحتها حلوة اوى ونزود مية وملح وبهارات عادى ورشة زيت بس على الوش ونخلى المية برضه يادوب تغطيها (فى معظم الاكلات نعمل كده على طول واما نبقى نحتاج مية نزود احسن ما تطلع ميتها كتير ومالهاش طعم) وبعدين نحطها على البوتوجاز على نار متوسطة كده لحد ما تستوى
وبعدين ندخلها تحت الشواية تتحمر شوية من فوق وتتقدم بالف هنا
نيجي بقى للرز مشكلة المشاكل هههههههههه اصلى جوزى متعقد منه علشان مش بيعرف يطبخه خالص
بصى يا ستى لو ارز مصري عادى كل كوبايه رز لها كوباية ميه ولو رز بسمتى كل كوبايه رز لها كوبايه ونص ميه
احلى طريقه علشان ما يعجنش
حطى معلقتين سمنة بلدى او زيت فى حله على النار وبعدين حطى مقدار المية بتاعتك ولو شوربة تبقى احلى طبعا واول ما تغلى نزلى الرز فيها وقلبيه وبعدين سيبيه لحد ما ينشف وحطيه على الشياطة يكمل سوا براحته وبعدين قلبيه مرة كده وسيبيه يكمل باقى السوا
لو الرز بقى حسيتي انه طالع معاكى ناشف وميته قليله متزوديهوش ميه علشان هيتعجن
لا حطى عليه ورقة فويل وغطيه كويس وسيبيه على النار يكمل سوى وبكده البخار هيسويه من غير ما يعجن ولا حاجة
والسلطة بقى اعملى سلطة خضرا عادية
وشوية شوية ان شاء الله هتلاقى كل الحاجات بدات تضبط معاكى
اللى عاوزة نوع خضار مثلا معين بقى او كده تقولى عليه ياريت او اى نوع اكل تانى علشان انا مش عارفه اقول اى حاجة من دماغى الزهايمر بعيد عنكم
